بستنى بشي يوم اصحا على صوت الحقيقة
لاقي كل الناس تغيرت وصار الصدق طريقة
صار الكزاب يقول عن حالو بكل صراحة
انا يا عالم بكزب و اللي مو عاجبو لعمرو
و الرقاصة تقول انا طالعة بها اليل و مو راجعة
و اللي بسكر عشان يهرب من هالعالم يقول بتمنى الرحمة
و اللي ما معو فلس و كان بصرف على صحابو فنطزة يقول انا ما عاد معي نجلة
و اللي كان يضرب مرتو لترضا امو يقول انا بحترم هالمرة
و التعبان من مشاكل عيلتو يقول انا حاجة ما فيي ضل بعد هالخناقة
امتا رح يصير كل هاد حقيقة
يمكن رح انطر كتير و بفكر احيانا انو ما في نتيجة
بس رح يجي يوم و ما نكزب على اللي بنحبهم و بنضل نعاندهم
لما نخسرهم رح نقول يا ريتنا قلنالهم
لو ما خبانا عنهم ما كنا خسرناهم
لو حضناهم و خبرناهم باننا ما كنا بننام لولا بنسمع اصواتهم
لو خبرناهم انهم كانو جزء من احلامنا و كوابيسنا و كل ليلة كنا بنشوفهم
لو قعدت على حضن ستي و خبرتها قبل ما ترحل رحلتها الاخيرة اني رح اشتقلها
لو قلتلها اني بكيتها بالليل بسبب مرضها
لو حملت ابن الجيران بالوقت اللي امو ترجتني اساعدها و كنت ما بحبو
بس ما جاملتها و قلتلها انا ما فيي احملو
بكفيني الكتب اللي على ضهري حاملها
لو انا برجع لورا شوي كنت بعملها
بحضن ستي و بوسها
و بحمل ابن الجارة و بجبر خاطرها
و بقول للي بحبو لا تروح خليك ليلتها
و ما بكزب على امي أبدا و بقلها اني بحبها
و لابي بقلو شكرا على اشيا عشاني عملها
و اشيا ضحا فيها عشان انا ما بحبها
لستي بقول انا اسفة على كل تانية تركتك فيها لوحدك غريبة
لصديقتي ما تحزني لانك رح تلاقيني جمبك بالغربة
رح كل يوم احكيكي و خبرك شوصار ما صار و كل يوم خبرية
للي ضل ينطرني تحت الشباك بالليل لنام رح قول شكرا و اهدي احلى هدية
و للغيمة اللي حملتلي مطر من بلاد بعيدة
و للشمس اللي وصلتلي شعاع و صلني بكير على الصبحية
و للبحر اللي تحملني و تحمل اسراري الكبيرة
بقول انتو اصدقاء عمري و بحملكم امانة
خلو سري بيناتكم و لا تخبرو حبيبي
و لو سالكم قولولو راحت و صارت بعيدة
تركتلك امانة فوق الخزانة
هناك في صندوق ستي اللي كانت سعيدة
تركتلو مسبحة و سجادة وقصيدة
وانا سلمت الامانة و بكرا بشوفو بالجنة
رح اتركلو كمان ذكرى فريدة
دفتر و كتاب و شوية اماني
كنت بحملهم بقلبي قبل ولود القصيدة الاخيرة
من هون انطلقت لرحلتي الاخيرة
و ما بعرف ازا الرجعة قريبة
جميلة
ردحذف:)