رح أكتب بالعامية اليوم...لانو ما بعرف ازا رح أقدر اعبر عن حالي بالفصحا اليوم بالزات...ممكن يكون في حيتنا اشيا كتيرة بتصير وما بنفهمها...الاشيا اللي بتصير ممكن ما بنتحملها ولا بنلاقيلها تفسير وخاصة ازا كنا من النوع اللي بيسموه حساس شوي... او شويتين على قول المصريين.. انا يمكن من النوع الحساس تلات شويات هاي ما بعرف مين بيقولها بس انا قلتها...
المهم في الامر في اشيا بتزعج الانسان وخاصة لما يكون متل ما قلت مثالي شوي في نظرتو للامور..مثلا اليوم قررو في الادارة عنا انهم يعملو ربط لاجهزة الحاسوب مع بعضهم البعض وهادا معناه انو كل الاجهزة صارت مراقبة مرة وحدة من قبل شخص ممكن يكون فضولي او ممكن ما يكون ...عشان انا ما بحب اظلم حدا بالفعل ممكن ما يكون فضولي وبدو يتجسس على الاشيا اللي بنعملها طول 8 ساعات عمل بس الفكرة بالنسبة لالي ولغيري كتير مزعجة وخاصة لما تكون متأكد انك بتقوم بعملك المطلوب منك وانو كل شي عم بيصير متل ما بدهم...
اللي انا بحسو انهم بتعاملو معنا من منطلق الشك في البداية...يعني ما تعمل هيك ولا تفكر فيه لاني انا شايفك مع انك ما بتكون تعمل شي بس تزكر انت لو عملت او لو فكرت تعمل فهم شايفينك..بالله شو هالسخافة اللي بيحكو فيها... ما عم بقدر افهم هالمنطلق بعلم الجناية بيقلك انو المتهم بريء حتى تثبنت ادانتة عنا لا العكس صحيح البريء متهم حتى يثبت تورطه... انت طول الوقت متهم وولا عمرو رح يظهر شي يخليك بريء في عيون هدول الناس اللي بيتعاملو من منطلق الشك البحت ...شك مطلق في الآخر...
لا والفكرة الاسوء من هيك لما متلا بيقولولك شي وبيحاولو يوصلو للناس التانيين ليتأكدو أد ايه انت انسان بتحفظ الاسرار وممكن يمدحوك قدام ناس تانيين في حين انو بينك وبينهم بيبهدلوك ...
اللي بدي اقولو بعد كل هالحكي والبرم اللي بطعمة وبلا طعمة انو الفكرة مين المسؤول عنا... وكيف بيتصرف احيانا بتحس صاحب المركز كتير اصغر او اقل من الناس اللي بيشتغلو عندو.. اقل معرفة واقل خبرة..طب ليش هو المسؤول او لانو عمرو بالخمسين او اواخر الاربيعين ...يعني بيثقو فيه لانو كبير...لانو بيعرف كيف يدير الصغار...والله ما بعرف ويمكن ولا حدا بيعرف المهم انو فكرة المراقبة وانت بتعرف انك مراقب كتير مزعجة... والله
