مصر تهدد ولا تدين

اول مرة انا بكون جدا سعيدة لما بسمع كلمة وحدة مجرد كلمة بتخليك طاير من الفرح، هالكلمة ممكن تستغربوا لو انتو مش وطنيين لانو الوطني بتفرق معو كتير، الكلمة بتتعلق بالكرامة والشهادمة والعروبة...

لما مصر هددت او حذرت بالاحرى اسرائيل من شن هجوم على غزة...لك يا جماعة من تلاتين سنة ونحنا نسمع ادانة وشجب للفعل الفلسطيني وحتى اسرائيل لو قتلت مئات منا بنضل ندان وندان وندان...نحنا عم نموت او ندافع عن انفسنا وفي كل الحالات مدانين اول مرة بنسمع كلمة دولة عربية تحذر اسرائيل ....اي والله بدها زغرودة فلسطينينة مصرية وطويلة كمان ...هههههههه

مبروك رجعتك لالنا اختنا الكبيرة مصر

الحب حلو

ما في شي أحلا من الحب في الحياة...بيعطيك دفعة معنوية وحتى بنقدر نقول مادية كمان...هو زي الهوا والمي والعصير :) بمزح طبعا

بس عنجد الشعور كتير حلو...والاحلا مو انو تحب انسان وتضل بعيد عنو الاحلا انو تلتقو وتصيرو تحت نفس السقف تعيشو مع بعض حياتكم لحظة بلحظة ودقيقة بدقيقة...تتخانقو...تتصالحو بعد الخناقة وما في احلا من الحب بعد الخناقة...تاكلو وتشربو تستمتعو ف الشغل سوا والدراسة...تقسموا شغل البيت بين بعض... 

ضباب كثيف

الضباب يلف القرية الصغيرة، لا أحد يخرج من منزله ولا أحد يحاول الخروج، الكل ملتف حول المدفأة، المطر غزير في الخارج، هو يحتسي كأس الشاي منتظرا خبرا سعيدا، او على الاقل كان يأمل بهذا، أي ان يحمل له ذلك القادم في هذا الجو العاصف الماطر البارد خبرا كان يود سماعه...

اما هي فكانت تشعر بالملل والوحدة وانقشاع النور وحلول الظلام مبكرا على غير العادة، سارة امراة عاطفية جدا، وهو رجل عقلاني بشكل لا يوصف، قد تغضب هي وتشعر بالقهر والتعب و يتسائل هو بكل بساطة عما يزعجها...

تجيب من غير تردد لا شيء، وفي الواقع لا شيء يغير مزاجها المتعكر منذ زمن، لست اقدر الوقت، ولا اعرف تقديره

لكنها مستاءة، الا انني اتوقع ان تتحسن وتتغير وتحمل الايام القادمة لها الكثير من السعادة...

 Hope :)

أحبك لا أحبك تحبني لا تحبني

ورقة وقلم
دخان وغبار وافكار
أحبك
لا أحبك
تحبني
لا تحبني
تبقى مجرد أفكار تأتي وتذهب
لا اشك في حبي
ولاأشك في حبك
لا اعرف كيف أعبر
ولا تعرف احيانا كيف تعبر
أتعب
تتعب
أمل
تمل
نرهق أنفسنا
أحبك
لا أحبك
تحبني
لا تحبني
ليست هنا القضية
تفهمني؟
أفهمك؟
أحيانا؟
دائما؟
غالبا؟
بين فينة واخرى؟
أغضب منك؟ تغضب مني؟
تكرهني لدقائق؟ أكرهك؟
تتعبني ؟ أتعبك؟
تعشقني؟ أعشقك؟
لا تتمنى في الدنيا غيري؟ أحبك؟ لا احبك؟ تحبني؟ لا تحبني؟
تتعبني؟ اتعبك؟ تؤلمني؟ أؤلمك؟
مش عارفة

كأنو ما في شي ينقال من زمان

يمكن خلص الحكي أو ما بقى في داعي اصلا نحكي، يعني احيانا الحياة بتصير رتيبة ومملة بشكل كبير كتير واحيانا بيكون فيها اكشن او حركة زي ما بنقول بالعربي، واحيانا لما بنحزن ما بنقدر نقول شي ولما نفرح كمان ما بنعرف نعبر يعني هيك هيك بالفرح والحزن ما بيجي على بالنا نكتب ولما ننشغل كمان ولما نفضا حد الملل ما بجي ع بالنا كمان نكتب...

مني وعلي روحي فرفطت من الكتابة وعدمها والشغل وعدمو والدراسة وعدمها ....

صرت ما عم بقرا ولا عم بكتب ولا عم بفضا شو بعمل بالضبط ما بعرف كل اللي بعرفو انو النها ببدا وبعدين بيخلص وبيبدا واحد تاني وبيخلص وهيك الحال....

صابني حالة من الملل والشعور بالرتابة وخايفة كتير انو موهبتي بالكتابة تخف او تضيع او تروح مش عارفة...

او يمكن تعبت وما بقا بدي احكي او اكتب او حتى اتذمر...

عم بقبل الاشيا متل ما هي من دون ما اتمرد عليها او حاول حتى ناقش وبدي ضل هيك لانو قلة النقاش والحكي بتريح بس ما بعرف لامتا....

موت وحياة

نود احيانا لو نموت مرتين او ثلاث ....نود احيانا ان نولد ...لا شيء اجمل من تلكم الحادثتين ..لا شيء اروع من الحياة ولا شيء اجمل احتجاجا وانسحابا اكثر من الموت ... لا يتناقضان ولا يختلفان لكل منهما هالة تلتف حوله فالموت يأتي بعد حياة والحياة تاتي قبل الرحيل بقليل ...لا يتصارعان لكل منهما موسمه ولا يتنافسان فلكل منهما طالبه...فذلك العجوز الذي تعب من التنفس الاصطناعي في غرفة مظلة في مستشفى بعيد...لا يتمنا شيء غيره هو المخلص والمنقذ والصديق والحبيب ...يتمناه يريده بقوة وبشدة.

وتلك الام المتعبة بحملها طوال 9 اشهر ...تتمنا حياة الطفل تريد سماع بكاءه واحتجاجه على اليوم الاول في الحياة...والنفس الاول والقبلة الاولى...لكل مطلبه وامنيته...

زهق

هاليومين زهقانة كتير وعم حس بتعب مالو حدود ...ما في شي الو طعم ولا لون ...مو حلوة الدنيا لما نشوفها بلون اصفر...بس عم نكزب ونقول انو شايفين كل الالوان... لانو بوقت من الاوقات مضطرين نظهر بعض من التفائل امام الناس اللي بيهمونا...الشغل صاير بيقصر العمر ... الحكي ما عم يعبر عن الناس ...حتى لو حكيت بيفهموك غلط...مهما كانت نواياك منيحة وطيبة بس ما بعرف بيضل الشك عند الناس نسبتو اكبر من اليقين حتى الناس اللي بتعرف بعض من زمان كتير الناس ما عاد تصدق بعض...

اشيا كتيرة بتمر باليوم بتنكد على الواحد وقد ما حاول بالاخر بينام بكيان...يمكن الدموع بتغسل شوية حرن..او هي نوع من التعبير عن الحزن بلاش الواحد يروح وينفجر...لانو الحزن ازا ضل ف القلب بيدبح بقا لما يطلع على شكل دمعة من العين بيكون بشكل او باخر نوع من التعبير والاحتجاج... انا ازا بدي احكي عن حالي بقدر اقول انو روحي كتير مفرفطة وزهقانة كل هالعالم اللي بيدور حولي ...كلو ملل وتعب وما في شي عشان نتحمس...

ما بعرف يمكن يكون هالشي عابر ...ويمكن ما بنقدر احيانا نعبر في ساعات الفرح الا اننا لما نتدايق على طول بندور على المفاتيح بالكمبيوتر وعلى الورقة والقلم لانو ممكن يستوعبنا اكتر من كتير ناس حولينا لو حاولنا نشرحلهم ما رح نوصل معهم لاي شي ....

وهيك خلص نهاري لليوم...بتمنا يكون نهار بكرا احلا...ان شاء الله تعالى